Eftirlaunalífeyrir

Fullur lífeyrisréttur miðast við 67 ára eftirlaunaaldur. Hægt er að flýta lífeyristöku allt frá 60 ára aldri eða seinka allt að 80 ára aldri. Sé töku eftirlauna flýtt lækka mánaðarlegar greiðslur en hækka ef töku þeirra er seinkað. Eftirlaunalífeyrir er greiddur til æviloka.

Í samþykktum sjóðsins má finna töflu II þar sem sést hlutfall réttinda eftir því hvort töku ellilífeyris er flýtt eða frestað. Taflan er unnin af tryggingastærðfræðingi út frá fæðingarári og lífaldri Íslendinga.

• Aldur í töflu miðast við að greiðslur hefjist frá og með næsta mánuði eftir afmælismánuð.
• Við sjötugt eru greiðslur endurskoðaðar með tilliti til iðgjalda sem hafa borist eftir að viðkomandi hóf töku eftirlauna.
• Hefjist taka eftirlauna fyrir 67 ára aldur er sú ákvörðun endanleg og verður ekki breytt. Þar með fellur niður sjálfstæður réttur til örorkulífeyris.

Heimilt er að hefja töku á hálfum lífeyri. Sá hluti sem frestað er tekur breytingum skv. samþykktum hvers tíma.

Í lögum um almannatryggingar frá 2016 er kveðið á um skilyrði þess að fá greiddan hálfan lífeyri frá TR:

• Sjóðfélagi þarf að hafa náð 65 ára aldri.
• Allir skyldubundnir lífeyrissjóðir sem sjóðfélagi á rétt í, innlendir sem erlendir, skulu samþykkja að hann taki hálfan lífeyri.
• Greiðslur úr lífeyrissjóðum og frá Tryggingastofnun hefjist samtímis.
• Sjóðfélagi þarf að vera virkur á vinnumarkaði en þó ekki í meira en hálfu starfi.

Athuga þarf að skilyrði fyrir hálfum lífeyri hjá Tryggingastofnun geta mögulega breyst ef breytingar verða á lögum eða öðrum gildandi reglum sem varða lífeyrisgreiðslur stofnunarinnar.

Úttekt séreignarsparnaðar eða tilgreindrar séreignar getur skipt miklu máli þegar upphaf eftirlauna er skipulagt og það er góð regla að fara yfir málið með ráðgjafa.

Flestir eiga lífeyrisréttindi í fleiri en einum sjóði. Ekki er heimilt að flytja almenn lífeyrisréttindi á milli lífeyrissjóða.

• Oftast dugar að sækja um greiðslu lífeyrisins hjá þeim sem síðast var greitt til.
• Eigi sjóðfélagi réttindi í öðrum lífeyrissjóðum er umsóknin send til annarra hlutaðeigandi ef óskað er.
• Í lífeyrisgáttinni er hægt að finna upplýsingar um lífeyrisréttindi í öðrum sjóðum, að undanskildum séreignarsparnaði.

Við mælum eindregið með því að sækja um með rafrænum skilríkjum með því að smella hér. Hafir þú ekki rafræn skilríki eða átt þú ekki kost á því að skila rafrænni umsókn þá er hægt að sækja eyðublað og senda okkur á netfangið birta@birta.is. Eyðublaðið má finna hér.

Útborgunardagur síðasti virki dagur mánaðar. Eftirlaun eru greidd mánuði eftir að réttur til þeirra myndast og er greiðslum haldið áfram ævilangt. Lífeyrir greiðist ekki aftur í tímann.

Ef ákvörðun hefur verið tekin um að hefja töku lífeyris t.d. 67 ára er fyrsta lífeyrisgreiðslan greidd síðasta virka dag næsta mánaðar eftir að aldrinum er náð, þ.e. mánuðurinn eftir afmælismánuðinum.

Lífeyrir er verðtryggður og fylgir mánaðarlegri breytingu á vísitölu neysluverðs. Hann tekur mið af áunnum réttindum og hefur hvorki hámark né lágmark.

Samspil almannatryggingakerfisins og lífeyrissjóðanna getur verið talsvert flókið, þar sem lífeyrisgreiðslur og fjármagnstekjur geta skert greiðslur almannatrygginga.

Við útgreiðslu lífeyris er staðgreiðsla skatts dregin frá í samræmi við gildandi lög um skattlagningu tekna.