Séreign inn á lán

Séreignarsparnaður færist með reglubundnum hætti inn á höfuðstól húsnæðislána til lækkunar frá og með þeim mánuði sem umsókn berst. Séreignarsjóðir reyna eftir fremsta megni að greiða inn á lánið á þeim tíma sem að greiðslan getur farið öll inn á höfuðstól. Séu lán í vanskilum fer greiðslan eftir hefðbundinni greiðsluröð samkvæmt lánaskilmálum. Ef lán er greiðslujafnað þá greiðist séreign fyrst inn á greiðslujöfnunarreikning lánsins, en hann er hluti af höfuðstól lánsins. Vegna þess að ekki er greitt af stöðunni á greiðslujöfnunarreikningnum fyrr en síðar þá kemur lækkunin á greiðslubyrði ekki fram strax þótt að höfuðstóll lánsins lækki.

Hámarksúttekt einhleypra er, að öllum skilyrðum uppfylltum, 500.000 kr. á ári, alls 3.500.000 kr. á tímabilinu. Hámarksúttekt hjóna eða samskattaðra einstaklinga er, að öllum skilyrðum uppfylltum, 750.000 kr. á ári, alls. 5.250.000 kr. á tímabilinu.

Sá sem ekki á íbúðarhúsnæði til eigin nota getur átt rétt á að taka út inneign í séreignarsjóði sem myndast hefur af iðgjaldsstofni á launatímabilum frá 1. júlí 2014 til 31. desember 2025, upp að ákveðnu marki, ef hann festir kaup á slíku húsnæði í síðasta lagi 30. júní 2023. Með umsókninni skal fylgja afsal eða gögn um skráningu á íbúðarhúsnæði í Þjóðskrá, ásamt staðfestingu um að umsækjandi sé ekki skráður eigandi að öðru íbúðarhúsnæði.

Hámarksúttekt einhleypra er, að öllum skilyrðum uppfylltum, 500.000 kr. á ári. Hámarksúttekt hjóna eða samskattaðra einstaklinga er, að öllum skilyrðum uppfylltum, 750.000 kr. á ári.

Ekki er sótt um húsnæðissparnað sérstaklega fyrr en kaupsamningur liggur fyrir en greiða þarf reglulega iðgjöld í séreign samkvæmt samningi við vörsluaðila séreignar.

Sækja skal um úttekt eða ráðstöfun í tengslum við kaup á fyrsta íbúðarhúsnæði til ríkisskattstjóra. Umsókn um úttekt séreignarsparnaðar í tengslum við öflun á fyrsta íbúðarhúsnæði þarf að berast í síðasta lagi tólf mánuðum eftir að kaup áttu sér stað með undirritun kaupsamnings. Þinglýstur kaupsamningur, afsal eða gögn um skráningu íbúðarhúsnæðis í Þjóðskrá skulu fylgja umsókninni, auk staðfestingar á því að umsækjandi sé ekki skráður eigandi að öðru íbúðarhúsnæði.

Hámarkstími sem heimilt er að nýta sér heimildir til úttektar/ráðstöfunar á iðgjöldum í séreignarsjóði í tengslum við kaup á fyrstu íbúð/nýbyggingar er tíu ár. Tíu árin byrja að líða frá því tímamarki sem ráðstöfun telst hafa hafist. Er þá miðað við fyrir hvaða launatímabil iðgjöld sem tekin eru út voru.

Frjálst er að skipta um húsnæði á þeim tíma og ráðstafa séreignarsparnaði inn á lán sem tekin eru vegna nýs húsnæðis í staðinn. Skilyrði er að kaup á nýrri íbúð fari fram innan 12 mánaða frá sölu þeirrar íbúðar sem veitti réttinn í upphafi.

Hverjum einstaklingi er heimilt að taka út allt að 500 þús. kr. fyrir hverja tólf mánuði á almanaksári í samfellt tíu ár, án þess að það teljast til skattskyldra tekna sé því varið til kaupa á fyrsta íbúðarhúsnæði, eða til að greiðslu inn á lán vegna kaupanna. Greiðslur hvers einstaklings geta því numið allt að fimm milljónum króna á tíu ára tímabili.

Eigið framlag einstaklings getur numið allt að 4% af iðgjaldsstofni og að hámarki 333 þús. kr., og framlag launagreiðanda getur numið allt að 2% og að hámarki 167 þús. kr. Skilyrði er að framlag rétthafa sé ekki lægra en framlag launagreiðanda.

Skilyrði er að umsækjandi hafi ekki átt íbúðarhúsnæði áður og að hann afli sér a.m.k. 30% hlutar í slíkri eign. Eignin má auk þess ekki vera í eigu fleiri en tveggja einstaklinga.