Þau leiðu mistök áttu sér stað hjá sjóðnum við útgreiðslu á verðtryggðum sjóðfélagalánum að reiknaðar verðbætur innan mánaðar fram að útgreiðsludegi lánsins voru ekki greiddar út samhliða.

Samkvæmt reglum um verðtryggingu sparifjár og lánsfjár skal grunnvísitala verðtryggðs láns vera vísitölugildi vísitölu neysluverðs á þeim degi þegar lán er veitt. Verðtryggð lán fá skráð grunnvísitölugildi vísitölu neysluverðs sem gildir til verðtryggingar í þeim mánuði sem lánið er greitt út. Ný vísitala tekur gildi 1. hvers mánaðar og breytist línulega yfir mánuðinn fram að næsta vísitölugildi mánuðinn á eftir. Reiknaðar verðbætur innan mánaðar reiknast út frá grunnvísitölugildi vísitölunnar og að reiknaðri dagvísitölu vísitölu neysluverðs á útgreiðsludegi.

Öllum lántökum verðtryggðra lána þar sem ekki voru greiddar út reiknaðar verðbætur innan mánaðar við útgreiðslu lánsins í samræmi við ofangreint hefur verið sent bréf með útskýringum og útreikningi á þeirri fjárhæð sem þeir munu fá greidda inn á bankareikning sinn. Þessi fjárhæð eru þær reiknuðu verðbætur sem hefðu átt að greiðast út við útgreiðslu lánsins að viðbættum dráttarvöxtum frá útgreiðsludegi til 13.apríl nk. þegar leiðréttingin verður gerð.

Sjóðurinn harmar þessi mistök og hefur yfirfarið verkferla við útgreiðslu á sjóðfélagalánum til að koma í veg fyrir að sambærileg mistök endurtaki sig. Sjóðurinn fékk KPMG ráðgjöf til að yfirfara og staðfesta alla útreikninga og aðferðafræði í tengslum við leiðréttinguna og var sú yfirferð án athugasemda.